KALIBO, Aklan–Ro paghaead it pagkaon ag pagsindi it insenso ro pila sa mga tradisyon it mga Chinese para sa andang mga mahae sa kabuhi nga nagtaliwan eon.
Raya ro ginpahayag ni AJ Dy Zambrona kadungan it nagahilapit nga obserbasyon it pista minatay.
Suno kana nga nakasanayan eon it andang pamilya nga pilang adlaw antes ro Nobyembre 1 hay nagalimpyo sanda sa nitso it andang mga mahae sa kabuhi sa sueod it Chinese Cemetery.
Kaeabanan suno kana nga nagapangibabaw ro kulay puea nga mga gamit kada pista minatay bangud nga raya hay nagakahueugan nga ro naka-eubong hay mabuhay eon nga patay.
Kon puti hay bag-o pa eamang ukon sang dag-on ag ro dueaw hay ikaywang dag-on nga naka-eubong.
Samtang, bilang pagsunod sa andang tradisyon, ginpahayag ni AJ nga nagahaead ro mga pamilyang Pilipinong Chinese it mga pagkaon para sa mga namatay nga pamilya kaibahan ro Tikoy.
Ro iba hay nagbutang it mga imahe it dragon bangud nga raya ro pinaka gamhanan sa Chinese zodiac.
Kaibahan man ro dragonfruit sa mga ginahaead nga prutas.
May mga nagasunog man it Chinese paper money para sa mga patay.
Pinaagi sigon kara hay maka abot sa pihak nga kinabuhi ro kabuganaan.
Kadungan it paghaead it bueak ag pagsindi it insenso para sa mga namatay hay ro pagpangamuyo agud nga ipaabot ro andang mensahe ukon wish.
Ginahimo sigon it mga chinese ro magarbong paghaead sa pagpati nga hasta sa pihak nga kinabuhi hay magapangibabaw ro kabuganaan.
Matapos ro mga ritwal hay gina-uli ro mga ginahaead nga pagkaon ag dikara nagasaeo-saeo ro bilog nga pamilya.
