KALIBO, Aklan—Sa pihak it ginapangatubang nga COVID-19 pandemic, pila sa mga Chinese nationals sa Hong Kong hay nagpatigayon gihapon it andang natungdan nga selebrasyon it Chinese New Year.
Apang bukon it kapareho ko nagtaliwan nga mga dinag-on, simple eamang ro pagsaueog it kada pamilya ag owa anay it mga gina-imbitahan nga bisita.
Suno kay Bombo International Correspondent Edna Salvador Silva, tubong Barangay Bakhaw Sur, Kalibo ag mabuhay eon nga nagatrababo sa HongKong nga owa eon ro mga bonggang fireworks display partikular sa sikat nga victoria harbor ag mabahoe nga mga selebrasyon.
Bawae pa suno kana ro pagtipon-tipon it mga tawo bangud nga may multa.
Sa pihak kara, nagapabilin suno kana ro tradisyon it mga Chinese partikular ro paglimpyo sa palibot it mga baeay, paghanda it mga nagkaeain-aeain nga pagkaon, prutas nga orange ag mga matam-is nga pagkaon kapareho it chokolate, nagatau it mga red envelope ukon ampao ag tikoy, nagasuksok it puea nga eambong, nagasunog it mga papel ag nagabutang it mga pampaswerte sa eawas ag sa sueod it andang baeay.
Nagalitson man suno kana sanda it baboy nga matsa urok it bahoe kumpara sa pilipinas nga ro gina-litson hay mabahoe nga baboy.
