KALIBO, Aklan–Ro thyroid gland hay sangka hugis alibang-bang nga gland nga makit-an sa atun nga tutunlan.
Ro pagpanghaeok ag pagpanakit nga nababatyagan kara hay epekto it ginatawag nga goiter.
Bangud sa pagpanghaeok, ro mga nakaka-eksperyensya it goiter hay masami nga nagabahoe ro leog kamana man nga nabudlayan sa pagginhawa ag pagtueon.
Suno kay Dr. Alistair Kashmir Dela Cruz, Adult Medicine-Endocrinology nga ro goiter hay pwede nga maging hyper ukon hypo.
Maabu sigon nga factor nga nakakaapekto kung ham-an ro sangka tawo hay nakakaangkon it goiter.
Pila sa mga raya hay posibleng daea it stress, environment,m bad habits, pagnabdos, infection ag kakueangan sa iodine.
Base sa datus, mas mataas ro tyansa it mga babaye nga makaangkon it thyroid cancer kumpara sa kaeaeakin-an.
Posible sigon nga malikawan ro pag-angkon it nasambit nga baeatian.
Importante nga makaangkon it bastante nga nutrient sa eawas.
Kaibahan sa mga nutrients nga manami nga pang sukoe sa sakit nga goiter hay ro iodine, tyrosine, ag antioxidants.
Kinahang-ean man nga maging alerto sa mga posibleng senyales it goiter kapareho it pagbahoe it leog, paggutok it tutunlan, kabudlay sa pagginhawa ag pagtueon, masami nga pag-ubo ag pagkaea-os.
Nagakadapat eamang nga insigidang magpakonsulta sa doktor engkaso nga makabatyag it anumang senyales agud nga malikawan ro pag-grabe it kondisyon.
