KALIBO, Aklan–Ro arthritis ro tawag sa nagkaeain-eain nga kondisyon it rayuma nga may kaangtanan sa kaeawasan ag mga nakapalibot sa parte it eawas.
Suno kay Dr. Helmar Fantilanan-Soldevilla, sangka Internist ag Rheumatologist nga maabu nga klase it arthritis ro nakakaapekto sa milyun-milyong tawo.
Kaabuan kanda hay may edad eon ag posibleng naka-eksperyensya it mga baeatian kapareho it joint pain, gout ag pagpanghina.
Ro pinaka-ordinaryo nga klase it arthritis hay ro osteoarthritis nga nagatuga it pagkasamad it cartilage it tue-an.
Kaibahan man ro rheumatoid arthritis sa ibang klase it grabeng arthritis nga nakakaapekto sa kasukasuan sa pagbuhay it tyempo.
Masami nga gina-abot it pilang buean antes ma-eksperyensyahan it pasyente ro nagkaeain-eain nga sintomas kara.
Pila sa mga sintomas kara hay ro pagpaeanakit it kasukasuan; pagpang haeok sa parte nga naapektuhan it rayuma ag pagpanig-a it eawas kung bag-ong bugtaw ukon mabuhay nga nakapungko.
Ginapahayag nga maabu nga posibleng rason ro arthritis kapareho it injury, metabolism, genetics ag impeksyon.
Importante sigon nga magkakonsulta eagi sa doktor engkaso nga makabatyag it anumang sintomas para sa nagakaigo nga pagbueong.
