Ro mga katigueangan hay nakakaexperiensiya it sip-on daywa hasta ap-at nga beses kada dag-on ag ro mga pamatan-on man eabi eon ro mga preschoolers nga nakakaangkon it sip-on 6 hasta 10 beses sa sang dag-on.
Kon ginasip-on , kinahangean nga mag-inom it maabung tubi, juice ag tsaa.
Bangud nga nakakabulig raya nga bayluhan ro mga naduea nga tubi sa eawas samtang nabibilog ro sip-on ukon may eagnat.
Likawan nga mag-inom it kape bangud nga nagatuga raya it dehydration.
Ro pagpanigarilyo hay nagapa-grabe man it sintomas.
Mag-eowas kara, dapat man nga maghigop it sabaw it manok; magpahuway; obrahon nga komportable ro kwarto; maglimugmog it maeaba-ab nga tubi nga may halong asin sa agahon agud nga maghawan ro tutunlan; maggamit it nasal spray ag mag inom it vitamin c tablet.
Kaeabanan nga ro sip-on hay nagabuhay eamang it sang domingo ukon daywang domingo.
Kon ro sintomas it sip-on hay mag grabe, magkonsulta eon sa doktor .
