KALIBO, Aklan—May kasadya nga gin-abangan it mga deboto ro pagbisita sa probinsiya it Aklan it Imahen it Poong Nazareno it Quiapo makaron nga adlaw it Huwebes, Abril 20, 2023.
Ro poon hay unang bumisita sa Most Holy Rosary Parish Church it Barangay Rosario sa banwa it Malinao.
Halin sa pagdungka it ginsakyan kara nga barko sa Caticlan hay matsa-fiestang ginsug-aeaw ro sagradong imahe it mga debotong nag-abang sa kilid it karsada bitbit ro mga tarpaulin.
May iba kanda nga nagsunod sa motorcade paagto sa nasambit nga simbahan nga may nakasab-it nga flaglets ukon mga maisot nga lobo nga kulay maroon ag gold sa andang side mirror.
Pila sa mga deboto hay sa simbahan eon naghueat para sa misa nga ginsundan it tradisyunal nga “pahalik” ag punas.
Nagpatigayon man it vigil sa simbahan agud nga hantup nga makapangamuyo ro mga deboto.
Suno kay Fr. Salvador Piad, kora paroko it nasambit nga simbahan nga magapabilin ro imahen it Itom nga Nazareno sa andang parokya sa sueod it daywang gabi-i ukon hasta sa Sabado antes nga isaylo sa iba pang simbahan.
Maswerte sigon sanda bangud nga napili ro andang simbahan nga pagabutangan it imahen kabaliktaran sa naunang plano nga sa simbahan it Boracay ag Kalibo nga owa nadayun bangud sa seguridad.
Igabutang man ro Poong Nazareno sa St. Joseph Spoused of the Blessed Virgin Mary Church sa Banga ag Diocesan Shrine of Our Lady of Most Holy Rosary Parish sa banwa it New Washington agud nga makit-an ro imahen.
Sa Abril 24 hay makaangkon it farewell mass sa simbahan it New Washington antes nga bumalik sa Quiapo Church.
