KALIBO, Aklan—Uwa gin-intindiha it mga deboto ni Senior Santo Niño de Kalibo ro magae-om nga panyempo ag ro nagapadayon nga paeag it pandemya tuga it coronavirus disease 2019 ukon Covid-19 makatambong eamang sa misa sa ulihing adlaw it selebrasyon it Ati-atihan Festival 2021.
Sa ginpatigayon nga pilgrim mass nga ginpangunahan ni Bishop Jose Corazon Talaoc it Diocese of Kalibo, sumentro ro anang homiliya sa ongang Hesus nga simple, transparent ag masaligan.
Uwa man nakaeowas sa homiliya it obispo ro naeksperyensyahang pandemya nga nagtuga it grabeng epekto sa social relationships, education ag work dynamics, sa mga pamilya, ag sa kabuhi it Christian community kaibahan eon ro liturgical life.
Una kara, nakontento eon lang ro mga parishioner’s sa mabahoe nga TV screen sa guwa it Saint Jhon de Baptist Cathedral masubaybayan eamang ro ginapatigayong misa bangud sa 50 porsyento eamang ro ginapasugtang makasueod sa simbahan agud makaangkon it physical distancing.
Maskin nga may paeag it pandemya, uwa nagpaawat ro mga deboto ag personal nga nagtambong sa misa nga nakaugalian eon nga himuon kada dag-on sa pag-abot it kapyestahan it batang Hesus.
Ro dag-uang Kalibo Sr. Sto. Niño Ati-atihan Festival nga kilaea man bilang “Mother of All Philippine Festival” hay ginadayo it libo-libong mga deboto ag mga turista halin pa sa nagkaeain-eain nga bahin it nasyon bangud sa kakaiba ag orihinal kara nga pagselebrar.
Apang, naging makasaysayan ro pagselebrar makaron nga dag-on bangud halin sa dating masangag tuga it waea-tu-o nga merrymaking ag street dancing hay gulpi eon lang raya nga naghipos bangud nga ginkansela tanan it lokal nga gobyerno ro mga aktibidad nga nakataeana kada dag-on.
