KALIBO, Aklan—Nagbyahe eon ko Hulyo 6 ro mga delegado it Western Visayas paagto sa Cebu City para sa 64th Palarong Pambansa nga maga-arangkada sa Hulyo 9 hasta 16.
Suno kay Mr. Hernani Escullar Jr., spokesman it Department of Education (DepEd) Region 6 nga gabi-i it sabado hay nagbiyahe ro mga delegado nga ginaeakipan it mga atleta, coaches ag iba pa halin sa isla it Panay ag Guimaras sakay it barko samtang aga-aga it domingo hay nag-pull-out man ro mga taga-isla it Negros via San Carlos City.
Haum eon man suno kana ro andang billeting quarter sa Guadalupe Elementary School sa V. Rama Avenue sa Cebu City sa pagpanguna it accommodation ag mess committee.
Sa pag-abot it delegasyon hay nakaangkon it simpleng programa sa pagsug-aeaw kanda.
Samtang, maskin nga ro ibang playing venues hay medyu maeayo kapareho it Lapu-Lapu City ag Madaue, apang manageable man sigon raya sa pag-ayos it transportation committee .
Sa pihak nga parte, kumpinyansa ro DepEd Region 6 nga kon indi man maeabawan ro overall champion nga NCR hay mapabilin it Western Visayas ro andang ikaywang pwesto nga naangkon ko 2023 Palarong Pambansa bangud man sa ginhimo nga training kun sa siin tanan nga kompetisyon hay pagapasakupan it mga atleta.
Maga-umpisa ro pahampang sa Hulyo 11 hasta 15.
