KALIBO, Aklan—Nag-alsa balutan ro mga delegado it nagapadayun nga Aklan Provincial Athletic Meet matapos nga ginsoe-ob it baha ro andang billeting quarter sa Kalibo Elementary School.
Suno kay Wilfred Tulio, sambilog sa mga sports coordinator it District of Altavas nga bandang ala-1:00 it aga-aga kat mabugtaw sanda nga ginsoe-ob eon it tubi-baha ro andang gina-eugban nga kuwarto sa nasambit nga eskwelahan.
Owa sigon napan-uhan it iba pa nanda nga kaibahan ro pagsueod it tubi baha bangud sa sobrang gaoy sa mga gin-intrahan nga hampang.
Haeos sang dangaw ag tunga suno kana ro baha sa sueod it andang kuwarto, apang sa playground it eskwelahan hay hasta sa tuhod ro kadaeumon.
Umpisa kabi-i hay naka-experiensiya it mabaskog nga uean ro bilog nga probinsiya it Aklan nga naging rason it pagka-eumos sa tubi baha ro pilang mga kalye sa banwa it Kalibo kaibahan ro mga billeting quarter it mga atleta.
Ginsaylo ro masobra sa 200 nga delegado sa kaiping nga eskwelahan nga KISEC, kun sa siin, medyu elevated ro mga classroom.
Gindugang pa ni Tulio nga kinahang-ean nanda nga maisaylo ro mga atleta ag mga kagamitan bangud nga hasta pa sa domingo nga adlaw posibleng matapos ro pahampang.
