KALIBO, Aklan—Balik sa dating kapagsik ro pagbiyahe sa Kalibo International Airport.
Suno kay Engr. Eusebio Monserate Jr., Civil Aviation Authority of the Philippines ukon CAAP-Aklan head nga buhos eon ro mga pasahero sa nasambit nga paeuparan eabi eon ro mga domestic tourist nga nagabakasyon sa isla it Boracay.
Raya hay kasunod it uman nga pagbukas kara sa kauna-unahan nga kahigayunan para sa mga turista , kun sa siin nagapangunang katuyuan nga uman nga mapabaskog ro industriya it turismo sa tunga it naexperiensiyahan nga pandemya.
Gindugang pa ni Engr. Monserate nga sambilog sa mga senyales kara hay ro paggamit it mga airline companies it mga mabahoe nga eroplano kamana man nga sigidas eon ro andang pagbiyahe.
Uman suno kana nga nabatyagan ro kaabuon it mga pasahero kat antes ro pandemya.
Kaabuan kara hay naghalin sa National Capital Region ukon NCR.
Sa pihak kara, ginklaru nana nga owa pa sanda nagabaton it mga international tourists bangud sa pagtuhaw it omicron variant.
Para sa mga nagasueod nga turista, kinahangean nga mag-presentar it vaccination certificates ukon vaccination cards agud nga ma-isyuhan it QR code, samtang ro mga bukon pa it bakunado ukon naka-1st dose pa eamang hay obligado nga magsumite it negatibong resulta it RT-PCR test.
Nakakalhit man ro mga guwardiya ag tawuhan it paeuparan agud nga masiguro ro seguridad ag pagsunod sa health and safety protocols.
