Maka-alarma ro report nga 1,670 nga pamatan-on ro nagakamatay sa aksidente sa karsada kada dag-on.
Suno sa Philippine Statistics Authority (PSA), ro mga biktima hay puro naga-edad it sang dag-on hasta 19.
Base sa datos halin sa PSA, ko Setyembre 2022 eamang hay sangka ap-at nga dag-on nga ungang babaye ro namatay ag gindaeaganan pa it naka-SUV sa Manila, samtang ginbawian man it hueam nga kabuhi ro ap-at nga dag-on nga unga ag anang ama kat bumunggo sa sambilog pang saeakyan sa South Cotabato.
Posibleng indi malikawan ro aksidente bangud nga owa man it may gusto nga may matabu nga maeain apang, may kahigayunan nga puwedeng maging mas madahan.
Pirmeng magbaeon it pasensya ag konsensya.
Kun maeain ro pamatyag, indi eon magmaneho.
Kon may samad ro saeakyan, indi eon ipilit nga ipaguwa ag pirmeng magpangamuyo nga giyahan kita samtang nagabiyahe sa karsada.
Ipangamuyo naton nga indi kita mapahamak ag indi makasakit it iba.
Halimbawa, sa pagmotorsiklo, mataeupangdan nga maabu gid man ro mga pasaway.
Owa it maayos nga helmet, eabaw sa tanan ro angkas, pati eapsag kaibahan, nagapilit nga magbiyahe maskin nga owa it tueog, gaoy ukon hilong.
Kamana man ro ibang drayber it kotse, jeep, bus, trak ag iba pa.
Kapos sa kasayuran sa batas-trapiko rason nga naeakot sa aksidente.
Mag-eowas sa mga saeakyan ag drayber, daeahig man ro mga traffic enforcer nga ginaeauman nga kabulig sa pagpabilin it maayos ag eowas nga karsada ag bukon it bantay-salakay.
Panawagan man sa gobyerno, ayuson ro mga karsada, sangkiri nga uean, may buho, lubak ag kutkot pa.
Gamiton ro pondo it maayos.
Sa ulihi, tanan man kita hay magapanipueos.
Protektahan naton ro mga pamatan-on, ilikaw naton sanda sa maeain nga sitwasyon sa karsada.
