KALIBO, Aklan—Mabahoe ro posibilidad nga uman nga maapektuhan ro pagbiyahe it mga pampublikong saeakyan sa oras nga ipatuman ro “no vaccine, no ride policy” sa probinsya it Aklan.
Raya ro ginpahayag ni Mr. Leandro Lenciano, Presidente it Banga-Kalibo Transport Services Cooperative sa interview it Bombo Radyo Kalibo.
Sa kamatuoran suno kana makaron pa eamang hay apektado eon ro andang kita umpisa kat mag-eupok ro pandemya.
Apang, owa sigon sanda it mahimo kundi sundon ro igapagguwa nga polisiya halin sa Inter-Agency Task Force (IATF).
Nagapati sigon sanda nga tuyo eamang kara nga protektahan ro kaeowasan it publiko kontra sa paeag it COVID-19 eabi pa ag padayun ro paglobo it mga nailistang kaso kada adlaw.
Ginpaathag ni Lenciano nga syento porsyento eon nga bakunado ro mga driver ukon miyembro it andang kooperatiba bangud owa nanda ginapasugtan nga magbiyahe ro owa pa nabakunahan.
Sa makaron, nagapabilin nga 60 percent ro andang seating capacity kamana man nga P20 ro andang sukot nga pamasahe samtang may limang pisong diskwento man para sa mga senior citizen, estudyante ag person with disabilities (PWD).
