KALIBO, Aklan—Naga-aray eun makarun ro mga driver it van nga nagabiyahe it Kalibo paadto sa Caticlan vice versa bangud sa sigidas nga pagmahae it presyo it mga produktong petrolyo.
Suno sa L300 van driver sa Triple A terminal nga si Boy Marte, owa eun sanda it mag gina-uli pa sa andang pamilya bangud haeos maigo eun lang sa pambayad it boundary ag krudo ro andang ginakita.
Kung dati hay nakauli pa sigon sanda it 500 hasta 300 makarun hay gina-utang eun lang nanda ro andang pambayad it boundary agud maskin papaano hay may maiuli sa andang panimaeay.
Sa makarun hay problemado man sigon sanda bangud sa hana euman nga pagtaas it presyo it petrolyo hin-aga nga adlaw.
Raya eun ro ginakabig nga super bigtime oil price hike.
Dugang pa kara nga nagpanaba eun sanda it pamasahe rason nga nalisdan eun sanda nga magpataas it uman.
Samtang, posible man sigon nga sa ulihi hay indi eun lang sanda magbiyahe pa kung sigidas ro pagmahae it pamasahe.
Sa makarun hay nagahinyo sanda sa mga pasahero nga magbayad it husto bangud kueang eun gid ro andang ginakita.
