KALIBO, Aklan–Aminado ro pilang ka mga driver it pampublikong transportasyon sa ikaywang distrito it probinsya it Aklan nga apektado ro andang kita bangud sa ginpatuman nga re-routing ag temporaryo nga pagsaylo it andang terminal sa Brgy. Bulwang, Numancia para taw-an it daean ro selebrasyon it Kalibo Sr. Sto. Niño Ati-atihan Festival 2023.
Suno kay Chyrel Tilar, operator ag mediator it Western Terminal nga owa sanda it mahimo kundi magtiis anay sa sangkiri nga ginakita.
Naintindihan man sigon nanda ro mga pasahero eabi eon ro mga estudyante nga mas ginapili nga magsakay sa L300 van ukon bus bangud diretso raya sa Kalibo.
Nasayuran nga hasta eamang sa gintaeana nga temporaryong terminal sa Bulwang ro tanan nga jeep, multicab ag tricycle nga nagabiyahe sa Western side rason nga uman nga magasakay ukon double ride paadto it Kalibo ro mga pasahero.
Bukon eon sigon it bag-o ro makarondayang sueondanan bangud dati eon raya nga ginapatuman.
Sa pihak kara, nagaeaum sigon sanda nga mag-abu ro numero it pasahero sa mga masunod nga adlaw partikular sa highligts it kapiyestahan.
