KALIBO, Aklan—Matapos nga ginpatuman ro total phase-out it mga motorized tricycles sa isla it Boracay nga naging epektibo ko Oktubre 1, pilang mga motorsiklo ag electric vehicles ukon e-trike ro ginpangdakop ag gin-impound sa mainland Malay.
Ginpangunahan it mga tawuhan it Malay transportation office ag Malay auxiliary police ro operasyon.
Pila sa mga gin-impound hay mga motorsiklo ag e-trike nga owa it permit to transport ag mga nagabiyahe gihapon nga degasolinang tricycle.
Nauna eon nga nag-apela ro sangguniang bayan it Malay ag mga tricycle drivers sa taeatapan ni Malay Mayor Frolibar Bautista nga ma-extend ro moratorium hasta sa Disyembre 31, 2020 para sa total phase-out it degasolinang tricycles sa tunga it kalisod nga naexperiensiyahan ag epekto it coronavirus pandemic, apang owa raya ginpasugtan.
Madumduman nga nagpaguwa si Mayor Bautista it Executive Order No. 31 ko Hunyo 17, 2020 nga nagatau it deadline para sa pagsumite it aplikasyon it tanan nga mga lehitimong tricycle franchise holders nga mag-avail it conversion halin sa tricycle paagto sa e-trike ko Hulyo 15, 2020.
Gintaw-an sanda it palugit nga hasta ko Setyembre 30 agud nga maka-avail sa e-trike project nga nagatuyo nga mabawaan ro pag depende sa pagkonsumo it gasolina ag eubusan nga duea-on ro nakasanayan nga klase it transportasyon sa isla.
Dag-on 2011 hay ginlunsar it gobyerno ro e-trikes sa isla para sa pag-angkon it greener and cleaner Boracay.
Nasayuran nga sa kabilugan nga 538 nga operators nga may tricycle franchises sa isla, kapin sa 84 eamang ro nag-apply sa e-trike program.
