Eapnaag gid man ro nagakatabu nga online child sexual exploitation nga imaw makaron ro target nga matapna it mga awtoridad.
Masubo isipon nga ro Pilipinas ro paboritong lugar makaron it mga sindikato ukon abusers matapos nga mailista ro mataas nga kaso it makarondaya nga mga inisdente nga mas pang naglobo ko tiempo it pandemya.
Nagmandu it grabeng away ukon giyera ro gobyerno kontra kara ag nagpaandam nga pagapasabton ro mga tawo nga eakot ukon may kontribusyon sa makarondaya nga mga ilegal nga hilimuon.
Suno sa report it Department of Justice(DOJ), nagtaas it kapin sa 260 percent ro insidente it child sexual abuse online nga natabu partikular kat magpatuman it mga lockdown bangud sa pandemya.
Masubo nga isipon nga mismong mga ina ukon igbata pa it mga unga ro nagabaligya kanda pinaagi sa online sexual exploitation nga ro kaeabanan nga rason hay bangud sa grabeng kapigaduhon.
Raya hay base sa ginpatigayon nga pagtuon it UK-based International Justice Mission.
Bukon sigon it maintok nga kantidad ro nabobo-oe sa makarondaya nga illegal nga hilimuon kundi mabahoe ro ginakita it mga tawo nga ginagamit ro mga unga agud nga kumita online.
Mag-eowas kara, madali man nga makabukas it site ag pinaagi sa teknolohiya, mas madaling maipadaea it mga perpetrators ro ginabaligya nanda nga mga minors.
Base man sa data nga ginpaguwa it DILG, umpisa 2017 hasta ko Hulyo, 2022 kapin sa 227 operations eon ro ginpatigayon kontra sa mga tawo nga eakot sa online sexual abuse it mga unga.
Sa nasambit nga numero, kapin sa 198 eon ro naipasaka nga kaso.
Naga-abot man sa 67 nga katawo ro na-convict eon sa nasambit nga mga kaso samtang 41 ro ginapaidaeum gihapon sa imbestigasyon.
Kaibahan sa mga eakot kara hay European, suno pa sa report.
Sa opisyal nga datos, naitala ro mga kaso it ‘online sexual exploitation’ sa 47,937 ko 2020 halin sa 19,000 ko 2019 sa tunga it restriksyon tuga it pandemya.
Dapat eon nga tuldukan ro makarondaya nga mga paggamit sa mga unga ag papanaugan it mas mabug-at nga penalidad ro mga tawong maeakot sa makarondaya nga mga hilimuon .
