KALIBO, Aklan—Uman nga nagpaadam ro mga eksperto angot sa pagtuhaw it monkepox virus sa pilang ka mga gamhanan nga nasyon sa kalibutan.
Suno kay Dr. Glenford Refre, Internist-Pulmonologist nga dapat maging alerto ag haum ro tanan para malikawan ro pagkalhit it tumaeagsahon nga baeatian.
Ro Monkeypox hay sangka viral disease nga nagahalin sa mga sapat ag nagapangunang nagakatabu sa mga tropical rainforest nga lugar kapareho it Central ag West Africa.
Posibleng mabuoe it sangka tawo ro monkeypox sa mga sapat nga infected kapareho it amo, squirrel ag iba pa pinaagi sa angkit ukon scratches.
Pwede man raya nga maipasa it tawo sa iba pa pinaagi sa exchange it large respiratory droplets kun mabuhay ro face-to-face contact.
Pwede man nga ma-expose ro tawo sa direct contact sa bodily fluids ukon contaminated items kapareho it eambong, haboe ukon towel.
May mga kaso man nga na-record sa Europa sa mga eaeaki nga nakipag-hieawas sa kapareho nga eaeaki apang ginapahayag nga ro monkeypox hay indi makabig nga sexually transmitted infection.
Sa pihak kara, padayun ro pag-engganyo ni Dr. Refre sa mga pumueoyo nga ugalion ro permi nga paghugas it alima, pagsuksok it face mask ag paglikawa sa maabu nga crowd para malikawan ro iba pang baeatian mag-euwas sa COVID-19 pandemic.
