KALIBO, Aklan–Gin-umpisahan eon it Commission on Elections ukon Comelec-Kalibo ro andang roadshow caravan and demonstration para sa automated counting machine.
Ro mga empleyado it barangay hall it Poblacion, Kalibo ro naka-buena mano nga mag-testing sa nasambit nga makina .
Suno kay Atty. Christian Itulid, election officer it Comelec-Kalibo nga nagpatigayon sanda it demonstration ag lecture angot sa ACM kaibahan ro mga empleyado it barangay hall.
Gintaw-an sigon it kahigayunan ro pila sa mga raya nga maka-shade sa balota ag makasueong kara sa makina.
Gintalakay sa lectures ro mga features it ACM nga pagagamiton sa maabot nga midterm elections sa Mayo 2025.
Dugang pa nga nagpanupod man ro komisyon it mga flyers agud nga maging familiar ro publiko sa proseso it automated voting sa eleksyon.
Dugang pa ni Atty Itulid nga pagalibuton nanda ro 16 nga barangay sa Kalibo ag iba pang mga election stakeholders agud nga magpatigayon it roadshow caravan.
Suno kana nga ro kick-off kunta kara hay ko Lunes pagkatapos it flag raising ceremony it LGU-Kalibo apang owa nadayun bangud sa ginpatuman nga work suspension bangud sa naeksperyensiyahan nga mga pag-uean ag pagbaha ko domingo nga adlaw.
Ro voters’ education campaign hay magabuhay hasta sa January 30, 2025.
Nasayuran nga pila sa mga bag-ong features it ACM hay ro 14-inch touchscreen, sensor, scanner, printer, camera, universal serial bus ports, external keypad ag may voter’s receipt receptacle.
