KALIBO, Aklan — Haum eon ro Kalibo Pilot Elementary School, sambilog sa mga eskwelahan sa banwa it Kalibo nga may maabu nga polling precints ag numero it mga botante sa maabot nga eleksyon sa Lunes, Mayo 12.
Suno kay Allan Relloto, principal it nasambit nga eskwelahan nga preparado eon ro andang mga pasilidad ag ro mga manugturo nga magaserbi sa eleksyon sa bulig it iba pang natungdan nga ahensiya it gobyerno sa idaeum it guidance it Comelec.
Ro andang eskwelahan sigon hay may gintaeana nga 6 nga polling precints.
Agud nga indi mag-ginutok ro mga botante, ginpakalhit nanda raya sa bilog nga compound it eskwelahan nga may nagakaigo nga distansiya.
Nagtaeana man sigon sanda it waiting room kaiping it andang presinto.
Samtang, ginpasiguro sigon it Comelec nga may igadeploy nga mga kapulisan sa oras nga madaea eon ro mga election paraphernalias ag sa adlaw mismo it eleksyon para sa kaeowasan ag seguridad it eskwelahan.
Dugang pa nga sa Mayo 7 hay may pagahiwaton nga final testing and sealing ro Comelec sa mga automated counting machines sa sueod it andang eskwelahan nga pagagamiton sa eleksyon.
Pila pa sa andang plano hay magpatuman it one entry, one exit policy ag hugut nga igabawae ro pagsueod sa gate it mga saeakyan it mga magaboto.
Apela man it principal sa mga botante nga haeungan ro andang mga pasilidad ag magboto it temprano ag likawan ro ginatawag nga “last minute syndrome” sa pagboto .
