KALIBO, Aklan — Gin-umpisahan eon it Provincial Environment and Natural Resources Office (PENRO)-Aklan ro pag-isyu it certificates of land classification status sa mga establishment owners sa isla it Boracay.
Sa interview it Bombo Radyo, ginklaro ni PENRO-Aklan head Valentin Talabero nga magata-o eamang sanda it sertipikasyon kon ro nahamtangan it establishimento hay una sa sueod it alienable and disposable.
Sambilog sigon raya sa mga requirements agud makabueo it Environmental Compliance Certificate (ECC).
Prayoridad sigon nanda ro mga hotels, resorts ag restaurants agud makaeagas ro operasyon sa soft opening it isla sa Oktubre 26.
Gin-abisuhan ni Talabero ro mga negosyante nga gustong magbueo it nasambitang dokumento nga magpadueong eamang sa andang command center sa Boracay ukon sa andang taeatapan sa banwa it Kalibo, magdaea it sketch plan ag tax declaration.
Ro mga establishimento sigon nga nahamtang sa forest land hay uwa pa nanda ginaasikaso samtang inde pa masolbar ro isyu.
Gin-insister pa ni Talabero nga ro mga compliant establishment eamang ro pasugtang maka-operate rason nga padayon kara nga ginaengganyo ro mga may pag-eabag pa sa 25+5 meter coastal easement ag road easement nga magpatigayon eon it self demolition kapin eon ro may naka-overhang nga istraktura.
