Kalibo Aklan ——May nagahueat nga penalidad sa mga trabahador ag mga establisimento nga mapas-eawan nga maka-renew it andang health cards.
Suno kay Malay Acting Mayor Frolibar Bautista nga obligado ro mga empleyado nga nagatrabaho sa mga establisimento sa banwa it Malay ag Isla it Boracay nga i-renew ro andang mga health cards bilang pagsunod sa requirements it andang naga-eksister nga ordinance no. 312-2012 .
Kinahangean sigon nga i-require raya it sangka kompaniya sa andang mga aplikante antes nga makasueod sa trabaho nga nagapamatuod nga healthy ukon fit to work ro trabahador .
Nakabaehag sa ordinansa nga ro mga empleyado nga maga-eabag hay may multa nga 2,500 pesos para sa bilog nga dag-on .
Ginpahayag dugang nga ro mga health card hay dapat nga i-renew kada dag-on.
Ginpataasan sigon nanda ro penalty agud nga obligado nga magsunod ro tanan ag malikawan ro pagpabaya-baya.
Samtang, sigidas man sigon ro paglibot it andang mga sanitary inspector sa nagkaeain-eain nga mga establisimento sa nasambit nga banwa.
