KALIBO, Aklan—Haeos sarado eon ro mga establisyimento sa isla it Boracay tuga it nagapadayon nga paeag it 2019 coronavirus disease ukon COVID-19.
Suno kay Astrophel Tabañera, board of director it Boracay Foundation Inc. nga 50 porsyento sa mga accredited hotels and resorts sa isla hay nagsarado it uman bangud sa kawad-an it mga turista ag bakasyunista kamana man haeos tanan nga mga restaurants nga nagasalig sa mga foreign tourist hay nakapadlock eon ro andang establisyimento.
Suno pa kay Tabañera, nabatyagan nanda ro grabeng epekto it makamaeatay nga virus bangud nga ro turismo eamang ro nagabuhi sa isla partikular sa mga negosyante, porters, tricycle drivers ag iba pa.
Mayad pa suno kana kat boracay closure hay may timeline kon san-o matapos ro krisis apang sa COVID-19 hay inde masayuran kon hasta san-o magapadayon ro epekto kara.
Sa makaron suno kana hay ginpabakasyon eon it mga establishment owners ro andang mga empleyado samtang ro iba nga uwa nagsara maskin uwa it customers hay ginapatuman ro flexible works days sa andang mga trabahador.
Ginapangamuyo eon lang sigon nanda makaron nga matapos eon ro krisis sa bilog nga kalibutan agud nga mabuhi it uman ro industriya it turismo ag ekonomiya it probinsya it Aklan.
