May daywang hangkat nga ginapangatubang ro senior high school (SHS) program nga dapat taw-an it atensyon.
Raya hay ro kahigayunan it trabaho it SHS graduates ag ro pagsueod nanda sa kolehiyo.
Sang dekada eon nga ginkasa ro K to 12 program, apang hasta sa makaron hay owa gihapon natuman ro kaeakip kara nga promisa nga makabo-oe it trabaho ag madaling makasueod ro nagtapos it senior high school.
Bangud kara, pamatyagan it mga estudyante ag ginikanan nga sanda hay na-scam.
Maabu ro nagtapos it technical-vocational courses nga owa it sertipikasyon ag importante raya agud nga sanda hay makasueod sa trabaho.
Mag-eowas kara, napamatud-an nga may mga SHS graduates nga nagaguwa nga bukon pa it haum sa kolehiyo ag may mga ginbo-oe sanda nga subjects nga naka-credit sa kolehiyo.
Dapat hay may koordinasyon ro Department of Education (DepEd), Commission on Higher Education (CHED), ag Technical Education and Skills Development Authority (TESDA) para masiguro ro maayos nga transisyon it senior high school graduates.
Kung aminado ro natungdan nga may problema sa programa, kunta hay naagapan ag natutukan raya it mayad imbes nga puro isyung pulitika ro gina asikaso.
Bangud nga ginhambae eon ni Pangueong Bongbong Marcos nga tapos eon ro OJT it mga ginbutang nana sa puwesto, basi nga puwede eon nga pahalinon ro mga owa ‘K’ ag bayluhan it mga may ikasarang , maaeam ag dedikasyon sa pagserbisyo sa publiko.
