KALIBO, Aklan–Opisyal eon nga nag-umpisa ro uman nga pagbalik sa eskwelahan it mga estudyante sa bilog nga probinsya it Aklan.
Nasayuran nga makaron nga adlaw maga-umpisa ro full implementation it face-to-face classes matapos ro masobra daywang dag-on nga pagpatigayun it blended learning.
Suno kay Mr. Allan Relloto, School Principal it Kalibo Pilot Elementary School nga half day eamang anay ro andang igapatuman nga klase makaron nga dominggo para mataw-an it kahigayunan ro mga manugturo, estudyante ag ginikanan nga makapanghimos matapos ro na-eksperyensyahan nga pagbaha tuga it bagyong Paeng ko nagtaliwan nga dominggo.
Ginmando man suno kana it Department of Education (DepEd)-Aklan nga sikyaron ro mga eskwelahan eabi eon ro mga naabot it tubi-baha.
Ginpahayag dugang nga pila sa andang classroom ro ginsue-ob it baha kung siin pila sa andang mga kagamitan ro nabasa.
Gintinguhaan eon man sigon nanda nga sikyaron ag buearon ro iba learning materials nga pwede pang magamit.
Samtang, umpisa sa masunod nga dominggo hay magapatuman eon it whole day nga klase ro nasambit nga eskwelahan.
