Naga-oponer ro pilang ka mga manugbaligya sa Kalibo Public Market sa ginadihon nga resolusyon it Kalibo Consumers Association nga paggamit it digital weighing scale.
Suno kay Rosalia Tampos, Tagapaghambae it vendors Kalibo Public Market nga apisar nga manami man kunta ro nasambit nga hagna bangud mas mapadali ag makita eagi ro maayos nga resulta it presyo it andang pagmaligya.
Bukon sanda it pabor eabi eon gid sa mga nagabaligya it mga pirmeng basa nga produkto partikular sa mga fish vendor.
Bangud sa pirmeng basa ag kinahangean nga pirmeng wisik-wisikan ro mga isda it maaeat nga tubi hay magaresulta raya it madali nga pagkasamad ag pagtuktok sa nasambit nga digital nga kilohan.
Ginklaro man ni Tampos nga owa man ginapabay-an ro mga tradisyonal nga kilohan kung siin ginatan-aw man sigon raya adlaw-adlaw it market master ag kung may pagpangdaya man nga makit-an hay gilayon man nga ginakumpiska ro mga kilohan.
Bukon sigon it sa kilohan ro problema kung may mag-eontad nga pagkasaea sa resulta it presyo apang ro mga ibang negosyante nga nagapamintaha sa mga bumaeakae.
Magapangluko sigon ro mga raya sa mga konsumidor , digital ukon bukon man ro kilohan.
Samtang, maging mabahoe sigon ro andang pagpamaeabag engkaso nga maaprobahan ag eubasan nga maging ordinansa ro nasambit nga resolusyon bangud bukon sigon it barato ro nasambit nga digital nga kilohan eabi eon gid ag ga amat-amat paeang sanda sa pagbangon maghalin sa naging halit nga daea it pandemya
