KALIBO, Aklan–Masako eon sa pag-display it nagkaeain-eain nga kolor it rosas ag bueak ro mga flower shop sa kahabaon it Roxas Avenue, Kalibo, sang adlaw antes ro Valentine’s Day.
Suno kay Marissa Restirio, staff it Jen Flower shop nga 24 oras sanda nga magabukas makaron nga adlaw bangud sa ginaeauman nga mabahoe nga demand it costumer.
Nagaeaum sigon sanda nga makabawi makaron nga dag-on sa andang kita kasunod it mas paghaeuga it restrictions.
Ginpaathag kara nga owa eon man it matabo nga paghueag sa andang presyo bangud owa eon sanda nagdugang pa it supply.
Nasayuran nga ro sangka stick it naka-arrange eon nga rosas hay mabakae sa balor nga P150 samtang ro tatlong bilog nga naka-set up eon hay P500 kamana man ro tunga sa dosenang rosas hay P1,000 ag P2,000 mat-a ro sang dosena.
Parehas eamang sigon ro presyo it maskin anong kulay it rosas apang ro pinakamabakae kada Valentine’s Day hay ro red rose.
Kaeabanan sigon sa andang mga parokyano sa raya nga espesyal nga okasyon hay mga estudyante.
