Kalibo Aklan —– Ginkumpirma it Department of Social Welfare and Development (DSWD) nga ro mga frontliner sa Barangay partikular ro mga Barangay Tanod, Health Workers, ag Daycare Workers hay kwalipikado para sa Social Amelioration Program (SAP).
Suno kay DSWD Assistant Secretary Rhea Peñaflor nga ginkonsidera it gobyerno ro apela ag rekomendasyon nga ieakip ro mga Barangay Workers sa pagataw-an it ayuda nga apektado it coronavirus disease 2019 (COVID-19) pandemic.
Ginpaathag kara nga makaibahan sanda sa target beneficiaries kon owa sanda it ibang source of income ukon manaba ro andang income.
Mag-eowas kara, dapat nga owa it sin-o man nga miyembro it andang pamilya ro nakabaton it bulig halin sa gobyerno .
Ginklaru dugang nga ro mga Barangay Workers nga indi makasabat sa andang adlaw adlaw nga kinahangeanon ro andang kita hay ma-qualify , apang ro may mga negosyo hay indi mahuyap .
Sa pihak nga parte, gin-engganyo man ni Peñaflor ro mga owa naeakip sa listahan it mga beneficiaries apang may manaba nga income ukon owa it income nga mag-apela sa natungdan nga Municipal Social Welfare and Development Office (MSWDO) officer .
Sa makaron hay sigidas sigon ro andang distribution it payout sa mga beneficiaries , kun sa siin , may kaibahan raya nga representante it DSWD agud nga insigidang makareklamo ro mga owa nakaibahan sa listahan it SAP .
Samtang, ro mga owa nakaibahan sa SAP beneficiaries hay pwedeng makapaeapit sa andang mga munisipyo para sa food packs , kun sa siin, sa makaron hay gin-download eon it Department of Budget and Management (DBM) ro andang IRA sa sueod it sang buean agud nga maitao nga ayuda sa andang mga pumueuyu nga apektado it krisis.
