Kalibo Aklan ——–Maskin nga fully vaccinated eon kontra sa COVID- 19, obligado sa gihapon ro mga turistang gustong magbakasyon sa Boracay nga magpakita it negatibong RT-PCR tests result antes nga makasueod sa Isla.
Raya hay sa tunga it anunsyo it Inter-Agency Task Force nga pwede eon nga gamiton it mga turista ro vaccination card maskin siin nga destinasyon.
Suno kay Malay Mayor Frolibar Bautista nga nahimo ngani nga peke-on it ibang turista ro RT-PCR tests results, ro mga vaccination cards pa ayhan nga gina-print eamang sa mga vaccination sites .
Gindugang pa kara nga padayun nanda nga iga-require ro swab result hasta nga owa pa it may ginpaguwa nga uniform vaccination card validating system .
Nauna eon nga ginpahayag ni Department of Tourism secretary Bernadette Romulo-Puyat nga may gina-develop eon nga cryptocode system ro Department of Information and Communications Technology ag contact tracing czar Mayor Benjamin Magalong nga makabulig para sa madasig nga pag-beripika it mga vaccination cards.
