KALIBO, Aklan—Klaru nga owa natuman ro mga ginpromisa it administrasyong Duterte.
Raya ro ginpahayag it batikang abogado sa Aklan nga si Plaridel Morania bilang reaksiyon sa bag-o eamang natapos nga ulihing State of the Nation Address (SONA) ni Pangueong Rodrigo Duterte.
Apang suno kay Atty. Morania nga naintindihan man nana ro sitwasyun ni Duterte bangud nga ro mga prayoridad nga isyu nga ginatutukan kara partikular ro droga, korapsyon ag kriminalidad hay owa it katapusan.
Mag-eowas kara, makabig suno kana nga masyadong mataas ro expectation it mga Filipino sa gin promisa it presidente ko tiempo it kampanya matapos nga magtau raya it deadline agud nga mawakasan ro nasambit nga mga problema.
Nagaeaum si Atty. Morania nga maging leksyon sa masunod nga presidente it Pilipinas ro naging kapaltahan ni Duterte ag padayunon ro mga naumpisahan nga reporma.
Sa pihak nga parte, bangud nga matsa imposible man nga maabot ro sambilog pa nana nga promisa nga magiging merry ro Christmas makaron nga 2021 bangud sa padayun nga pagtaas it kaso it covid 19, ginpanugyan ni Atty. Morania sa tanan nga maging kaparte it pagresolba sa problema pinaagi sa pag angkon it disiplina sa kaugalingon ag magsunod sa mga ginapatuman nga minimum health standard.
Eubus eon sigon nga apektado ro ekonomiya ag ikamayad nga eawas bangud sa krisis rason nga dapat nga maghimo it konkretong tikang ro gobyerno.
Bukon man sigon imaw it pabor nga magpadaeagan pa bilang bise presidente si Duterte sa maabot nga eleksyon ag likawan ro political dynasty.
