KALIBO, AKLAN — Amat-amat eon nga napalayas paguwa it Marawi City ro Maute group.
Sa pihak kara, ginpahayag ni Lt. Col. Rey Tiongson, acting Philippine Army spokesperson nga pahirapan ro paghueag it militar sa syudad bangud sa mga gintanom nga improvised explosive device (IED) it lokal nga teroristang grupo.
Daywang bangkay sigon it Maute group nga gin-aywanan it andang mga kaibahan ro narekober kaeakip ro pilang mga pampasabog.
Kapin sa 42 nga mga manugturo ro andang na-rescue sa tunga it engkwetro.
Bitbit sigon it grupo ro mga bihag nga sangka pari ag pilang hospital staff.
Ginkumpirma man ni Tiongson nga nag-umpisa ro bakbakan sa siyudad kat eusubon it militar ro ginapanaguang hide-out it high value target nga dating lider it Abu Sayyaf nga si Isnilon Hapilon kon sa siin insigida raya nga nakapangayo it back-up.
Ginpamalibaran man kara ro mga nagguwa nga balita nga may kaibahang dumueoong ro Maute group nga naka-bakbakan it andang tropa.
Samtang, ginpasiguro ni Tiongson nga apisar naga-iral ro martial law sa bug-os nga Mindanao, padayon nandang pangalagaan ro karapatang pantao it mga sibilyan.
