Kalibo Aklan ——Nagkasugot ro mga gobernador it Western Visayas nga magbueuligan sa uman nga pagbangon it ekonomiya nga eubus nga naapektuhan it coronavirus disease (COVID-19) pandemic.
Suno kay Aklan Governor Florencio Miraflores nga plano nanda nga magadungan sa pagbukas it natungdan nga mga paeuparan .
Ro turismo suno kana ro nagapangunang ginaboe-an it income it rehiyon ag indi makahueag ro ekonomiya kon padayun nga pagasaraduhan ro borders kara para sa mga turista .
Samtang, paga-umpisahan suno kana it ginbilog nga inspection team it Boracay Inter-Agency Task Force ro pag-usisa sa mga accomodation establishments sa Isla nga nagsumite it letter of intent nga magabukas it operasyon .
Kinahangean nga nakasunod ro mga raya sa minimum public health protocols sa tuyo nga maprotektahan ro mga turista ag mga workers .
Tatlo pa eamang suno kana nga hotel ro nataw-an it Certificate of Authority to Operate, apang ginaeauman nga sa katapusan it Hunyo hay maabu eon ro mataw-an kara .
Samtang agud nga malikawan ro pagpilan it mga turista, may gin-develop sigon ro Provincial Government nga online application para sa health declaration checklists nga importanteng dokumento para sa contact tracing engkaso nga may mag-positibo nga makasueod sa Isla.
Sa makaron hay nakaangkon eon it free movement ro mga tawo nga nagahalin sa Western Visayas agud nga mabuhi ro lokal nga ekonomiya ag turismo antes nga pasugtan ro mga foreign tourists sa Isla.
