KALIBO, Aklan —Bangud sa gina eksperyensiyang mabug-at nga daeagan it trapiko, eubusan eon nga iga bawae ro mga golf carts, bug cars ag tanan nga klase it terrain vehicles sa mga karsada sa isla it Boracay umpisa sa Marso 20.
Base sa Memorandum Order No. 2018-48 nga gin pagowa ni Malay Mayor Ceciron Cawaling, ro mandu hay suno sa gina patuma nga ordinansa umpisa pa ku 2015 pinaagi sa Municipal Transportation Office.
Dapat sigon nga gamiton eamang ro nasambitan nga mga saeakyan sa sueod it golf courses, mga hotels ag resorts.
Paga abisuhan sigon ro mga naga panag iya ag operator it golf car may kaangtanan sa nasambitang mandu.
Gin pahayag ni Mayor Cawaling nga kaparte raya it andang 6-month action plan agud maresolba ro grabeng traffic sa isla.
Nakasanayan eon nga gina pa-rentahan o nasambitang mga saeakyan sa mga turista sa andang paglibot eabi eon sa mga tourist spot sa mabukid nga porsyon it Boracay.
