Mga Gov’t employee: ipatuman ro mayad nga delivery of service sa publiko — CSC Reg’l. Dir.

KALIBO, Aklan — Kinahangean nga ro mga empleyado it gobyerno hay magserbisyo it husto sa publiko nga nakikipag-transaksyon kanda.

Raya ro ginpahayag ni Civil Service Commission regional director Nelson Sarmiento sa ginpatigayon nga  seremonya it  “Pasidungog 2019”  nga  kauna-unahan nga kahigyunan nga ginhiwat sa Aklan, Biyernes it agahon sa 3^rd floor it Kalibo Municipal Hall.

Suno kana nga mas maabu ro nagahingabot nga makatrabaho sa gobyerno kaysa sa pribadong kompaniya nga kon sa siin pamatuod kara ro pagbuhos it mga gustong magbo-oe it CSC examination.

Dapat suno kana nga ipatuman ro mayad nga delivery of service sa publiko bangud sa mas mataas nga ginabaton nga sweldo ag mga benepisyo .

Samtang, ginpaathag pa ni director Sarmiento nga  ginapatigayon nanda ro honor awards program agud nga ma-motivate ro mga government employees nga ayuson ro kalidad it andang performance ag serbisyo publiko.

Gin-engganyo man nana ro mga Akeanon nga magpasakop sa nagkaeain-eain nga rewards and recognition program it CSC ag indi eamang makuntento sa pagiging regional awardee kundi nga makasaka sa national level.

Samtang,  sa nasambit nga kahiwatan, ginkilaea man ro Bombo Radyo Kalibo ag iba pang organisasyon ag indibidwal nga naging kabulig it nasambit nga ahensiya.

Ro recognition program hay sambilog sa mga aktibidad kadungan sa andang  selebrasyon it  119^th foundation anniversary ko buean it Setyembre.

Samtang,  ginkilaea man ro haeos 37 anyos nga pagserbisyo sa gobyerno ni CSC-Aklan provincial director Evelyn Ejar nga naka-retiro eon sa pwesto matapos nga maabot ro mandatory retirement age nga 65, apang ginpa-extend sa pwesto agud nga makaangkon it smooth transition sa magabueos kana hasta sa Oktubre 30 it makaron nga dag-on .