KALIBO, Aklan—Buhos sa gihapon sa covered court it Kalibo Pastrana Park ro mga nagapabakuna para sa pediatric population ag mga eligible population gamit ro bakunang Pfizer.
Raya hay matapos nga ginbuksan it lokal nga gobyerno it Kalibo ro walk-in vaccination.
Suno kay Hernan Lawrence Laserna, Nurse II it Municipal Health Office ukon MHO-Kalibo nga bangud sa kaabuon it mga gustong magpabakuna, nagpanupod sanda it number stub ag naghimo it daywang linya agud nga malikawan ro pagdueutdutan.
Nagtaeana sigon sanda it 500 stub para sa target nga pediatric population ag 500 man sa mga naga-edad it 18 pataas.
Ro mga owa nakahingabot hay gin-abisuhan nga magbalik sa Lunes.
Samtang, ginabaton sa walk-in vaccination ro mga estudyante nga iya sa banwa it Kalibo naga-eskwela maskin nga taga-ibang banwa.
Gindugang pa ni Laserna nga kaabuan sa mga gustong magpabakuna hay mga estudyante sa pagpati nga maga-umpisa eon ro face to face classes sa masunod nga dag-on kasunod it padayun nga pagnaba it kaso it COVID-19.
