KALIBO, Aklan—Gulping nagtaas ro numero it mga pumueuyu nga gustong magpabakuna kontra sa Covid-19.
Raya ro ginpahayag ni J-Lorenz Dionesio, Nurse III ag vaccination manager matapos nga gin-anunsyo nga iga-require eon ro vaccination card sa pagsueod sa mga establisimento komersiyal.
Nasayuran nga pilang establisyemento ag taeatapan ro naga-usoy makaron it vaccination card sa mga customer ukon kliyente sandig sa ginpaguwa nga Executive Order No.001 series of 2022.
Naging mahaba sigon ro pila sa gintaeana nga vaccination center sa ABL sports and cultural complex, kun sa siin eubus nanda nga ginkakibot.
Suno kay Dionesio nga gintaeana nanda ro agahon para sa mga walk-in nga nagapaturok it unang dose it Covid-19 vaccine samtang sa hapon hay para sa naka-schedule nga 2nd dose ag booster shot.
Ginpadumdum man kara nga owa it walk-in sa booster shot bangud nga pre-scheduled ro mga raya.
Maghueat eamang sigon it text halin sa Provincial Health Office para sa proper schedule ag time slot.
Samtang, bangud sa kahaba-on it pila, ro mga owa naka-abot sa cut-off time nga 12 noon hay gintaw-an it priority number agud nga makabalik pagka-aga.
Ginpahayag dugang nga sa pihak it pagbuhos it mga tawo, hugut nanda nga ginapatuman ro minimum health standards partikular ro physical distancing bilang proteksyon it vaccination team ag ko mga gustong magpabakuna.
Magadere-deretso sigon ro andang vaccination roll out para sa 1st dose hasta sa masunod nga domingo.
Posible man sigon nga magadugang it iba pang vaccination sites ro PHO.
