KALIBO, Aklan–Gin-imbitahan it pamunuan it Kalibo Municipal Police Station ro mga head it security guard sa banwa it Kalibo para sa sangka dayalogo.
Suno kay PLT Aubrey Ayon, Deputy Chief of Police for operation it Kalibo Municipal Police Station nga naging madinaeag-eon ro andang pakikipag-istorya sa mga security personnel nga nagtambong sa andang imbitasyon.
Tuyo sigon kara nga malikawan ro kaparehong hitabo sa RD Pawnshop kung siin brutal nga ginpatay it guwardiya nga si Mark Archie Torrefiel ro reliever-branch manager nga si Bonna Hercia Ambay.
Gintalakay sigon sa nasambit nga dayalogo kung ano ro duty ag function it mga guwardiya sa kada estabilisyemento.
Kapin sa waeo ka mga security agency sigon ro nagtambong sa natungdan nga dayalogo nga ginakaeakipan it operation ag security officers.
Nagkasugot sigon ro mga raya nga idugang sa andang requirements sa paghire ro National Police Clearance ag ro pakikipag-coordinate sa kada isaea para masayuran ro background it aplikante.
Ginpahayag dugang nga tuyo man it hinun-anon nga maibalik ro kredibilidad it mga security guard ag maduea ro pagkabaeaka it mga pumueoyo.
