KALIBO, Aklan—Ginpamilit it mga health experts sa Aklan ro pagpatuman it Enhanced Community Quarantine (ECQ) ukon Modified Enhanced Community Quarantine (MECQ) agud nga mapugngan ro pagkalhit it COVID-19.
Suno kay Dr. Vim Samonte, presidente it Philippine College of Physicians Aklan-Capiz chapter nga nagpadaea sanda it sueat kaibahan ro miyembro it Aklan Medical Society kay Aklan Governor Florencio Miraflores para irekomenda sa Inter-Agency Task Force (IATF) nga ipatuman ro mas hugut nga quarantine classification sa bilog nga probinsiya.
Ginpahayag ni Dr. Samonte nga nagakabaeaka sanda nga bumagsak it eubusan ro local health system bangud nga haeos punuan eon ro ICU ag COVID ward it Aklan Provincial Hospital ag iba pang pribadong ospital.
Kon magadere-deretso suno kana ro makarondaya nga sitwasyon hay posibleng magaoy ro mga frontline health workers, magakaubusan it bueong ag iba pang importanteng gamit kapareho it mechanical ventilators.
Sa idaeum man it ginaproponer nga ECQ ukon MECQ, dapat sigon nga pabaskugon it provincial government ro pagbakuna.
Sa makaron, nagapabilin ro Aklan sa General Community Quarantine with heightened restrictions hasta sa Agosto 15.
Base sa record suno kana, umpisa Hulyo 18, 2021, ro COVID-19 cases sa Aklan hay owa naganaba sa 140 kada adlaw ag may 2 hasta 3 nga pasyente ro nagakamatay.
Una man sigon gihapon sa high risk ro Aklan matapos nga magpanguna sa may pinakamataas nga average daily attack rate (ADAR) sa bilog nga Western Visayas.
