KALIBO, Aklan — Naga abot eon sa 100 ro mga hotels ag resorts sa isla it Boracay ro nakataeanang imbestigahan it Environmental Management Bureau it Department of Environment and Natural Resources (EMB-DENR) bangud sa iligal sigon nga pagkonekta sa drainage pipe it Metropolitan Waterworks and Sewerage System (MWSS) sa baylu nga maghimo it kaugalingon nga sewage treatment facilities.
Bangud kara, naga apaw ro mga mahigkung tubig sa drainage pipe nga para eamang dapat sa tubi-uean.
Samtang, gin tawag ni West Cove general manager Ben Mobo nga “fake news” ro sangka artikulo nga na-publish sa sangka pahayagan kun siin kaeakip sigon ro andang resort sa mga naga eabag sa sewage disposal.
Sa interview it Bombo Radyo Kalibo, gin pahayag ni Mobo nga owa sanda it nabaton nga notice of violations maghalin sa DENR.
Kaabuan sigon sa mga mabahoe nga resorts sa isla hay may sariling sewage treatment plant kun siin ro mga na-prosesong tubi hay ginagamit nga pang-flush sa banyo ag pangbunyag sa pananum.
Nauna eon nga nagpaandam ro DENR nga iga pasaka sa Pollution Adjudication Board sa pagpagowa it cease and desist order kontra sa mga pasaway nga hotel ag resort owners nga napaseawang magtao it solusyon ro nasambitang problema.
