KALIBO, Aklan–Normal para sa mga tawo ro magdugo kung sanda hay naninahan, apang may unang kondisyon nga maskin mga simpleng hueag eamang hay nagaresulta it pagpangdugo nga malisod punggan.
Sa health line portion it Good Morning Philippines program, gintalakay ni Dra. Ma. Theira Dorado Domalaon, Fellow, Philippine College of Hematology and Medical Transfussion ro nasambitang kondisyon nga ginatawag nga hemophilia.
Suno kay Dra. Domalaon, ro tawong may hemophilia hay kueang sa “clotting factor” ukon ro mga protina sa kaeawasan nga nagakontrol sa pagpangdugo.
“Rare” ukon maeaka eamang sigon ro mga tawong may hemophilia.
Dugang pa kara nga ro hemophilia hay “genetic” ukon masami nga namamana.
Sa pagka-unga pa eamang hay puwedi eun rayang maangkon ag magiging sakit it sangka tawo hasta nga imaw hay nagakabuhi.
Sambilog sa mga sintomas it hemophilia, mas kapin sa pamatan-on, hay ro pagkaangkon it mga gaob.
Masami nga pagpanakit it mga kasukasuan bangud maging ro mga raya hay nagadugo.
Indi man sigon gilayon nga mapunggan ro pagpangdugo it tawong may hemophilia kung sanda hay naninahan.
Ro mga tawong may hemophilia hay may una man nga dugo sa andang hingko ukon ihi.
Kinahangean man nga maghaeong it mga tawong may hemophilia bangud ro mga simpleng bagay kapareho it pagkatumba ag pag-toothbrush hay nagaresulta it pagpangdugo, depende sa kung mauno ka-grabe ro kondisyon.
Samtang, masami man sigon sa may hemophilia hay naka-eksperyensiya it internal bleeding ukon pagpangdugo sa sueod it kaeawasan.
