KALIBO, Aklan—Nagpanawagan si Aklan 2nd district congressman Ted Haresco nga indi eon paghaluan it pulitika ro mga proyektong pang-imprastraktura eabi eon sa anang distrito kasunod it pag-arangkada it political season para sa 2025 National and Local Elections.
Suno kay haresco nga dapat man nga makonsensiya ro mga opisyal sa provincial government bangud nga sambilog eamang ro andang katuyuan nga mataw-an it maayos nga pagpangabuhi ro mga Aklanon.
Dapat suno kana nga mas pa nga mapaeapad ro pagkaeasugot ag pagbueuligan bangud nga sa masunod pa nga dag-on ro eleksyon.
Ro mga pumueuyu suno kana ro nagasakripisyo sa mga nakatengga nga proyekto partikular ro under construction nga national highway nga sakop it Barangay Dumga, Makato.
Nauna eon nga ginpaabot it contractor sa kongresista nga nabudlayan sanda nga mapatapos ro proyekto bangud sa kawad-an it maboe-an it baeas .
Gina-alegar nga ginapaeag it provincial government ro mga supplier it sand and gravel nga indi sanda pag-isyuhan it panibag-ong permit sa andang quarry operation kon magatau it baeas para sa nasambit nga proyekto .
Makabig sigon raya nga eabag sa laye.
Sa makaron nakatengga ro proyekto it masobra eon sa waeong buean nga makabig nga delikado sa mga motorista ag nagatau it inconvenience ag delay sa mga naga-agi nga turista paagto sa isla it Boracay ag sa iba pang mga biyahero.
Sa pihak nga parte, matsa ginpabati-batian man kara ro uman nga pagsabak sa pulitika ni dating governor Joeben Miraflores nga eubusan eon nga magretiro ag bukon it puro kaugalingon nga interes ro gina-isip.
