KALIBO, Aklan–Uman nga nadugangan ro ginabatyag nga kalisod it mga jeepney driver matapos ro implementasyon it panibag-ong serye it pagtaas it produktong petrolyo sa nasyon.
Suno kay Jestonie Gatmaitan, jeepney driver it Kalibo-Dumaguet vice versa nga haeos indi eon makabawi ro andang ginakita sa sueod it sang adlaw nga hueas ag kagaoy sa pagbyahe.
Kabay suno kana nga mapundo eon ro sigidas nga pagtaas sa presyo it kada litro it petrolyo agud nga makabawi man sanda.
Sambilog pa sa ginakasubo it kapareho nana nga driver hay ro pagreklamo it pilang pasahero sa panueoktan it pamasahe.
Naghinyu man imaw sa mga sumaeakay nga intindihon ro andang sitwasyon bangud ro sector it transportasyon hay sambilog sa apektado it oil price increase.
Kaeabanan sigon kanda hay naga-boundary eamang rason nga ro sangkiri nanda nga kita hay pagatungaon pa nanda it operator.
Aminado si Gatmaitan nga masyadong mabahoe ro deperensya it andang kita sa makaron kumpara sa tyempo nga owa pa it pandemya ag ro pagpatuman it oil price hike.
