KALIBO, Aklan—Gintaw-an it punto it Gender and Development Office ro kinamatarong it mga kababayin-an kasunod it selebrasyon it National Women’s Month makaron nga buean it Marso.
Suno kay Gender and Development Officer Paul Adrian Pelayo nga dapat taw-an ro mga kababayin-an it kinamatarong nga makaangkon it kaugalingon nga desisyon kamana man nga mataw-an it oportunidad kapareho it mga kaeaeakin-an.
Dapat sigon nga wakasan eon ro gender inequality ag taw-an it patas nga pagtratar ro kada isaea.
Dapat man suno kana nga maging euwas halin sa violence, pagpang-abuso ag diskriminasyon ro mga babaye.
Kaparte man it pagselebrar it National Women’s Month ro pagpadumdom sa tanan angot sa mabahoe nga importansya ag papel it mga kababayin-an sa komunidad kung siin sanda ro ginatawag nga iwag it kada panimaeay.
