KALIBO, Aklan–Ro atay hay pangaywa sa pinakamabahoe nga organ sa eawas it sangka tawo.
May una raya nga nagkaeain-eain nga importanteng responsiblidad sa eawas rason nga importante nga maalagaan raya it tama.
Suno kay Dr. Jonathan Navarro, Liver Transplant Surgeon nga base sa mga pagtuon, mas common sa mga kaeaeakin-an ro pag-angkon it liver cancer.
Ro ap-at sigon nga mga nagapangunang rason it kanser sa atay hay ro liver cirrhosis, hepatitis B ag C, alcoholic liver disease ag ro mga ginakaon nga maabong fats.
Ginpahayag ni Dr. Navarro nga kung mabuoe eon ro tumor sa atay hay owa man it masyadong limitasyon sa pisikal nga aktibidad it pasyente.
Ro kinahang-ean eamang sigon nga likawan hay ro pag-inom it aeak kamana man nga makaangkon it tamang diet ag regular nga pag-ehersisyo agud maalagaan ro eawas.
