KALIBO, Aklan—Nauso makaron nga nagahilapit ro undas ro pagbaligya it mga kakanin.
Sambilog sa mga pwedeng mabak-ean kara kun sa siin maabu ro nagasakdag sa andang home made kakanin umpisa pa ko 2005 hay ro pamilya Itulid.
Suno kay Sharlyn Gay Itulid nga ro recipe it andang mga ginabaligya nga nagkaeain-aeai nga kakanin hay halin pa sa andang ina nga taga-Daja Norte Banga.
Ginsaysay nana nga nakipagsapalaran ro andang ina ko 2004 sa bulacan agud nga mag-usoy it produkto nga owa sa aklan nga pwede nanda nga maging negosyo.
Nag-umpisa sigon sanda it tig sangkiri anay nga pagbaligya partikular sa mga empleyado it bangko hasta nga nag-inabu ro andang order ag makabig nga mas pang nag-umwad ro andang negosyo.
Kaeabanan sigon nga madahog ro andang baligya makaron nga undas, fiesta, paska, bag-ong dag-on ag iba pang mga selebrasyon.
Naging mabahoe man sigon nga bulig makaron nga tiempo it pandemya ro pagbaligya nanda online.
Mag-eowas nga manami hay makolor pa ro andang mga produkto rason nga ginabalik-balikan ag ginapilahan.
Bangud sa kaabuon it order hay maga-cut-off sanda sa Oktubre 28 agud nga ma-accommodate ro tanan nga mga orders nga nagpa-reserve.
Limitado sigon ro andang ginapa-resell it produkto bangud nga kinahangean nanda raya nga ma-monitor.
Mag-eowas sa daywang branch sa Kalibo , may anda man sa Banga ag Boracay.
Naga-average sigon sa 30 nga ka nigo kon ordinaryong adlaw, apang kon may mga okasyon hay naga-abot sa haeos 500 hasta 1,000 nga nigo ro andang order.
