BANGA, Aklan—Nagpahayag it kaeain it buot ro mga kaklase ag kabarkada nga ulihing nakaibahan it 15-anyos nga si Jhuros Flores nga ginapatihan nga naeumos sa aklan river nga sakop it Brgy. Polo, Banga, ko hapon it Miyerkules, Enero 29.
Raya hay matapos nga may pilang indibidwal ag katapo it media nga nagpahayag sa social media nga posibleng may foul play ro pagkamatay it binatilyo rason nga kinahangean nga maimbestigahan it mga otoridad.
Nasayuran nga raya eon ro ika-an-um nga adlaw it ginapatigayon nga search and retrieval operation apang owa gihapon nakita ro anang eawas .
Ginsaysay it sambilog sa kaklase it biktima sa ginpatawag nga press conference it Banga Municipal Police Station nga grabe ro trauma nga andang inagihan matapos nga masaksihan kon paalin nga inanud it nagaragasa nga tubi ro biktima.
Dugang pa nga masakit sigon sa andang baeatyagon nga maduea-an it kabarkada ag owa nanda ginaeauman nga makaangkon pa sanda it isyu sa anang pagkamatay.
Nauna kara, ginpatawag ro mga ulihing nakaibahan ni Jhuros sa Women and Children Protection Desk it Banga MPS agud nga maboe-an it statement sa matuod nga natabu.
Ginpahayag nana nga nagsaeampitan sigon sanda nga mag-agto sa Brgy. Polo sa andang kaklase ag pagkatapos it praktis it andang “dula dulaan” hay ginsampit ro biktima it anang nga kabarkada nga magpaligos sa suba.
Gin-paandaman sigon nanda imaw nga indi eon magpaligos bangud sa posibilidad nga indi nana masarangan ro current it tubi ag indi pa raya kabaeo-baeo nga mag-eangoy.
Pihak nga parte, ginhana pa sigon nga buligan si Jhuros it sambilog nana nga kabarkada pinaagi sa pagtibong kana apang sa anang uman nga pagbutwa sa tubi hay nakita eon lang nana nga maeayo eon ro anang inanuran.
Kasunod kara hay nagpanic sanda ag nagpangayo it bulig sa mga residente sa lugar apang nag-eugdang eon si Jhuros sa tubi.
Sa an-um sanda nga nagtabok sa pihak nga pangpang ag nagpaligos, si jhuros eamang ro minalas nga owa nakatabok it uman bangud sa pagbaskog it sueog.
