Kalibo Aklan —- Ginaplantsa eon makaron it Lokal nga Gobyerno it Kalibo ro pagpauli sa mga Kalibonhon nga nastranded sa ibang probinsya.
Suno kay Municipal Disaster Risk Reduction Management Council (MDRRMC)-Kalibo Head Terrence Jun Toriano nga raya hay ginakaeakipan it mga estudyante, trabahador nga nawad-an it trabaho ag mga narepatriate nga Overseas Filipino Workers (OFW’s).
Ginpaathag nga haeos tatlong dominggo eon ro mga raya nastranded sa syudad it Iloilo, Roxas ag Cebu halin kat ginpaidaeom ro tagsa ka probinsya sa Enhanced Community Quarantine.
Ro pagpauli kanda hay may nagakaigong koordinasyon sa Provincial Inter Agency Task Force on COVID-19 ag sa mismong Provincial Government.
Ro nasambitang mga indibidwal kon makaabot it Aklan hay igapaidaeom sa home quarantine ag maid-id nga igamonitor ro andang kondisyon.
Sa pihak sigon nga zero case sa PUM’s ag PUI’s ro Kalibo, uwa gihapon sanda nagakampante kon sa siin nagapadayon ro hugot nga pagbantay sa mga border control bangud nga uwa sanda naila nga madugangan ro tatlong kaso it COVID-19 sa Kalibo nga ro mga pasyente hay una eon sa estable nga kondisyon ag nagapamayad eon sa nasambitang sakit.
