KALIBO, Aklan—Opisyal eon nga ginpangaeanan ni Aklan Vice Governor Reynaldo ‘Boy’ Quimpo ro pinal nga listahan it mga kandidato it partidong ‘Tibyog Aklan’ para sa nagahilapit nga eleksyon sa 2022.
Si Vice Governor Quimpo hay magapabilin sa anang posisyon samtang si Ibajay Mayor Jo-en Miraflores ro magabueos sa pwesto it anang ama sa pagka-gobernador.
Suno kay Quimpo, nagatindog man nga chairman it Tibyog Kalibo nga ro mga masunod hay ro magapadaeagan sa banwa it Kalibo bilang alkalde, Board Member Juris Bautista-Sucro kaibahan ro anang ka-tandem nga si incumbent Vice mayor Dr. Cynthia Dela Cruz.
Magiging kabulig nanda ro mga sanggguniang bayan members nga sanday re-electionists Philip Yerro-Quimpo ag Ketchie Luces kamana man sanday incumbent ex-officio members Ronald Marte ag Romelyn Flores.
Uman nga magahana nga magabalik si dating three term Kalibo Mayor Raymar Rebaldo bilang SB member, dating three term vice mayor Madeleine Ang-Regalado, dating SB ag SP member Lilian Quimpo Tirol ag Atty. Kristine Candelario Dela Cruz.
Sa pihak nga parte, gin anunsyo man ni Atty. Quimpo ro andang mga kandidato sa sangguniang panlalawigan sa unang distrito; raya hay sanday re-electionists Nemesio Neron, dating SP ex-officio member Apol Cleope it Balete ag Teddy Tupaz it Banga kamana man sanday three term councilors it Kalibo Mark Ace Bautista ag Mark Vega Quimpo.
Samtang sa second district, raya hay sanday re-electionist Jay Tejada, dating Nabas mayor Lolong Dalisay, dating SB member Jupiter Gallenero it Malay, three term Vice Mayor it Ibajay nga si Dary Solidum ag Numancia SB member Jojo Cordova.
Nakipag alyansa sigon kanda si incumbent Aklan 1st District Congressman Carlito Marquez para sa anang kandidatura samtang sa 2nd District hay nagapabilin si Congressman Ted Haresco.
Haeos daywang dekada eon suno kana ro katuyuan it Tibyog Aklan para sa united leadership sa probinsiya.
