KALIBO, Aklan—Hilway eon ro mga kandidato nga makaplastar it andang mga plataporma de gobyerno sa pag-arangkada it campaign period , hin-aga nga adlaw, Oktubre 19 para sa 2023 Barangay ag Sangguniang Kabataan Elections sa Oktubre 30.
Angot kara, hugut ro naging paandam ni Commission on Elections ukon Comelec Aklan spokesman Chrispin Raymund Gerardo nga magbutang eamang it mga campaign posters sa gintaeana nga common poster area.
Ginabawae man suno kana ro pagbutang it billboards, posters, tarpaulins ag individual posters nga eampas sa sukat nga 2×3 feet.
Bawae man ro paggamit it campaign ukon propaganda materials nga maga-eabag sa gender sensitivity principles, bastos, ag discriminatory, kamana man ro mga poster ukon tarpaulin nga owa it nakasueat nga “Political advertisement paid for/by.”
Samtang, ginapasugtan man ro pagpangampanya sa telebisyon, radyo, newspaper, internet, ukon social media sa idaeum it regulasyon ag sueundanan it Comelec.
Para sa man sa mga maga-eabag nga kandidato, magapadaea ro poll body it Notice to Remove ag Show Cause Order.
Dugang pa ni Gerardo nga magapatigaton man it Operation Baklas ro Comelec sa mga campaign materials nga nakapaskil sa mga bukon it otorisadong lugar umpisa October 20 hasta October 27, 2023.
Bukon it kaibahan sa operasyon ro mga common poster area kapareho it plaza, baealigyaan, barangay centers, ag iba pang kapareho nga lugar.
Pwede man nga magbutang it mga campaign posters sa mga private property apang kinahangean gihapon nga magsunod sa prescribed nga size kara.
Magabuhay ro campaign period it 10 adlaw ukon hasta sa Oktubre 28, 2023.
