Kasunod it nagahilapit eon ro nakataeana nga pagpatigayon it Barangay ag SK Elections, pabor si Kalibo Sangguniang Bayan Member Ronald Marte nga ipaidaeom anay sa drug test ro mga kandidato nga magasakar antes nga sanda hay opisyal nga magdihon it andang certificate of candidacy ukon COC.
Tinutuyo sigon kara nga malikawan nga makasueod sa konseho ro mga opisyal nga eakot sa ilegal nga hilimuon kapareho it droga.
Suno kana nga kaibahan ro Department of the Interior and Local Government ukon DILG hay ginkabuligan nga maging drug free ro tanan nga kabarangayan sa bilog nga banwa it Kalibo.
Kinahangean sigon nga masaea kun sin-o ro may ikasarang nga magpanguna ag maging mayad nga ehemplo sa andang constituents.
Bangud ro mga opisyal sigon it sangka barangay ro dapat nga nagapanguna sa mga hilimuon nga makapabag-o sa andang nasakupan eabi eon sa mga naeakot sa ilegal nga droga.
Padumdum ni SB member Marte nga gamiton ro paeaabuton nga eleksyon bilang kahigayunan nga indi eon ibutang sa puwesto sa Barangay ro mga eakot sa drugs.
Tinguhaan nga sa barangay level pa eang hay matapna eon ro problema sa droga ag pilion sigon ro mga magatau it proteksyon sa pamatan-on ag sa publiko.
Samtang, ginpasiguro man kara nga nagapabilin nga owa it kapitan ukon kagawad nga naeakot sa ilegal nga droga sa banwa it Kalibo.