KALIBO, Aklan–Owa masyadong gina-istoryahan sa Estados Unidos ro kandidato nga ginasuportahan sa pagkapangueo.
Suno kay Bombo International Correspondent Michelle del Fierro it Michigan, USA nga kaeabanan sa mga residente hay naga-display it yard sign agud nga ipahisayod kon sin-on nga presidente ro andang ginasuportahan.
Samtang nagahilapit suno kana ro eleksyon sa Nobyembre 3, padayun ro paghaeabyan it akusasyon nanday US President Donald Trump ag ro anang kaengkwentru nga si Democratic presidential nominee Joe Biden.
Mainit sigon nga isyu makaron sa election battle ro matensyon nga relasyon it US ag China eabi pa ag maabu ro naga-sentimyento sa pagtama it coronavirus pandemic.
Maabu sigon nga mga amerikano ro nagakabaeaka kon ano ro posibleng madangatan it andang nasyon engkasong magdaog si Biden nga gina-alegar nga puppet it China.
Madumduman nga sa pagpungko ni Trump sa pwesto hay ginputoe kara ro trade relations sa China.
